Cerca su Griselda
Questo sito usa cookie di terze parti. Leggi la nostra Informativa cookies oppure chiudi questo avviso

Indice

Poeti del Sud:
Poesie
Achille Curcio

L' orologiu

E propiu nt’a vijila ’e Capudannu,
quandu ’u cora mpuciutu d’amarizzi
si minta ’u scarfunija
nt’a cascia d’o passatu,
sarachijata e scura;
propiu nte sta vijila
trovavi, ormai scordatu,
l’orologiu chi patramma portava
de jornu nt’a giacchetta
e ’a sira, cu premura,
posava mu riposa
pe supra ’a culonnetta.
Supra ’u quatranta giallu e sculurutu
de quandu, primu masculu, nescivi
è signata precisa l’ura e ’u jornu,
n’annu luntanu,’u misa.
E su’ signati l’uri
de quandu  gridazzari
arrivaru nt’a casa frati e soru:
na mandra ’e criaturi joculani.
C’è ’u ritrattu pittatu
de quandu si spusaru
e ’a mamma ncorniciata
nte i luci de n’otaru.
Ce su’ signati ancora
jornati de doluri e cuntentizzi,
nu toccu de campana currivata
de quandu si nda jiu l’urtima nunna;
c’è na sporta ’e carizzi
chi patramma spartìa quandu tornava.
C’è puru ddha signatu
’u chiantu d’o Bombinu chi facìa
ogni notta ’e Notala,
i sugghiutti ’e doluri d’a Madonna
ogni venneri santu.


Ce su’ signati i lacrimi
de cui mangiava ncunu tozzu ’e pena
cundutu e assapuratu
cu nu cocciu ’e speranza.
C’è signata ’a nottata
e ’u répanu d’a morta d’o cinonaru
chi patramma abbrazzava,
comu fussi parenta,
quandu a Pasqua venìa mu ni saluta.
Ce su’ signati i guerri,
i frati chi partiru e non tornaru
o chiddhi chi tornandu
eranu nte la carna pezzijati,
nte l’anima sciancati.
Supra ’u quatranta giallu e sculurutu
de stu vecchiu orologiu
patramma misurava ’a vita sua,
’a vita ’e l’atri comu nte nu specchiu;
cu fara de mercanta
si misa mu misura de lu tempu
i jorni, i misi e l’anni.
L’uri passandu scrissaru na storia:
si fermaru nu primu de frevaru,
quandu ’u sula coddhau prima m’è sira,
e supra stu quatranta giallu e scuru
comu cira a lu focu si squagghiaru
i misi,i jorni e l’uri,
mu scurrunu sciogghiuti
nt’o mara senza praja,
duva ’u tempu ricogghia ogni suspiru.



dal volume ’U poeta non rida (2005)

Fondazione Carisbo
Alma Mater Studiorum
Dipartimento di Filologia Classica E Italianistica Alma Mater Studiorum - Università di Bologna
Via Zamboni 32 - 40126 Bologna - Cod.Fiscale: 80007013376 P.Iva: 01131710376 - © 2012
CREDITS: MEDIAVISION